لەهەولێر، کۆبوونەوەی لێژنەی باڵای بەهاناوەچوون و پاڵپشتی ئاوەرەکان سازکرا

لەهەولێر، کۆبوونەوەی لێژنەی باڵای بەهاناوەچوون و پاڵپشتی ئاوەرەکان سازکرا


سەرلەبەیانی ئەمرۆ پێنجشەمە 2020.10.15، بەسەرپەرشتی رێبەر ئەحمەد، وەزیری ناوخۆی حکومەتی هەرێمی کوردستان و بەئامادەبوونی هەریەک لە وەزیری پلاندانان و وەزیری کۆچ وکۆچبەرانی عێراق و د.فەرسەت سۆفی، پارێزگاری هەولێر و د.عەلی تەتەر پارێزگاری دهۆک و د.هەڤاڵ ئەبوبەکر، پارێزگاری سلێمانی و پارێزگاری کەربەلا و ژماریەکی دیکە لەبەرپرسانی ئیداری حکومەتی عێراق و حکومەتی هەرێمی کوردستان، لەهۆڵی شەهید سەعد عەبدوڵا لەهەولێری پایتەخت، کۆبوونەوەی لێژنەی باڵای بەهاناوەچوون و پاڵپشتی ئاوەرەکان، تایبەت بەپێداویستی ئاوارەکانی هەرێمی کوردستان و پڕۆسەی گەڕانەوەیان و میکانیزمێک لەم بارەیەوە سازکرا.

لەکۆبوونەوەکەدا، د.فەرسەت سۆفی، پارێزگاری هەولێر، لەوتارێکدا بەووردی تیشکی خسەسەر ژمارەی ئەو ئاوارانەی لەکۆتایی ساڵی 2014 و لەئاکامی هێرشی تیرۆرستانی داعش، ڕوویان لە هەرێمی کوردستان و بەتایبەتی لەشاری هەولێر کردووە و لەوبارەیەوە ڕایگەیاند: "لەهەولێر 6 کەمپی ئاوارەکان هەیە، وەکو ئیدارەی شاری هەولێر، هەموو هەوڵی خۆمان خستۆتەگەڕ لەپێناو پیشکەشکردنی یارمەتدان و گەیاندنی خزمەتگوزاری پێویست بۆیان، سوپاس بۆ هەموو ئەو لایەن و ڕێکخراو کەسانە کە هاوکارمان بوونە و یارمەتیانداوین بۆ گەیاندنی یارمەتیدانی ئاوارەکان چ ئەوانەی لە نێو کەمپەکانن یان ئەوانەی لەدەرەوەی کەمپەکاندان".

پارێزگاری هەولێر هەروەها وتی، "تەئکید لەسەر ئەوەدەکەینەوە، شاری هەولێر وەکچۆن هەمیشە شاری ئاشتی و ئارامی و پێکەو ژیان و پاراستنی ئەمن و ئاسایشی هاوڵاتییان بووە، بۆ هەموو ئەوانەشی ڕوویان لەشارەکەمان کردووە هەروا دەبێت، بەدڵنییایەوە وەکو ئیدارەی شاری هەولێر بەپاڵپیشتی و هاوکاری حکومەتی هەرێمی کوردستان درێغی ناکەین لەپێناو دابینکردنی خزمەتگوزاری و ژیانێکی شایستە و باش بۆ ئاوەرە و لێقەومان و هیچ کاتێکیش داوا لەهیچ ئاوارەیەک ناکەین بڕوات و شارەکەمان بەجێبهێڵێ مەگەر بەڕەزامەندی و خواستی خۆی نەبێت".