پارێزگاری هەولێر ناحییەی عەنکاوەی بەسەرکردەوە

پارێزگاری هەولێر ناحییەی عەنکاوەی بەسەرکردەوە

سەرلەبەیانی ئەمڕۆ یەکشەمە 2021.1.10 بەمەبەستی لەنزیکەوە ئاگاداربوون لەڕەوشی چۆنیەتی بەڕێوەچوونی کارەوبارەکانی ناحییەکە، هێمن قادر، پارێزگاری هەولێر بەوەکالەت، بەیاوەری نەبەز عەبدولحەمید، قایمقامی ناوەند و بەڕێوەبەری کاروباری ناوخۆی دیوانی پارێزگا، بەڕێوەبەراەیتی ناحییەی عەنکاوەی بەسەرکردەوە.

لەدانیشتنێکیدا لەگەڵ بەڕێوەبەری ناحییە و بەرپرسانی دیکەی ئیداری ناحییەکە، پارێزگاری هەولێر بەوەکالەت، وێڕای پیرۆزبایی دەست بەکاربوون لە بەڕێوەبەری ناحییەی عەنکاوە و دەستخۆشی لەبەڕێوەبردنی کارەکانیان ڕایگەیاند: "وەکو پارێزگای هەولێر بە گرنگییەوە دەڕوانینە عەنکاوە و ئەو ناحیەیەش لەلای ئێمە تایبەتمەندی خۆی هەیە و جەختیشی لەوە دەکەینەوە کە بەهەموو شێوەیەک پاڵپشت هاوکارتانین".

پارێزگاری هەولێر بەوەکالەت تەئکیدی لەسەر بەردەوامیدان و پەرەپێدان و پاراستنی ئەو برایەتی و پێکەوەژیان و کەش و ھەوا ئازاد و خۆشەویستییە کردەوە کە لە نێوان پێکھاتە ئاینی و نەتەوەییەکانیدا لەکوردستان بەگشتیی و لەهەولێر بەتایبەتی هەیە، پاشان لە کەم و کوڕی و کێشە و گرفتەکانی دەڤەرەکەی کۆڵییەوە و ئاماژەی بەوەدا وەکو پارێزگای هەولێر هەرچی لە تواناماندا هەبێ بۆ چارەسەرکردنی کەم و کوڕییەکان و گەیاندنی خزمەتگوزاری زیاتر بەهاوڵاتیانی ناوچەکە دەیکەین و دڵنیابن درێغی لێ ناکەین.

لەلایەن خۆیەوە بەڕێوەبەری ناحییەی عەنکاوە، وێڕای ئەوەی زۆر بەگەرمی بەخێرهاتنی پارێزگاری هەولێر بەوەکالەت و شاندی یاوەری کرد، ڕایگەیاند: "بە دڵنیاییەوە ئەرکمان قورسە، بەڵام به‌دڵنیاییه‌وه‌ بەهاوکاری و پاڵپشتی ئێوەی بەڕێز دەتوانین خزمەتی زیاتری هاوڵاتییان بکەین".