پارێزگاری هەولێر، عەلوەی هەولێری بەسەرکردەوە

پارێزگاری هەولێر، عەلوەی هەولێری بەسەرکردەوە


سەرلەبەیانی ئەمڕۆ سێشەمە 2021.1.12، هێمن قادر، پارێزگاری هەولێر بەوەکالەت، بەیاوەری نەبەز عەبدولحەمید، قایمقامی ناوەند و بەڕێوەبەری شارەوانی شەش، بەمەبەستی لەنزیکەوە ئاگاداربوون لەبەروبوومی جوتیاران و نرخی کاڵاکان و بەدواداچوون بۆ هاوردەکردنی سەوزە و میوەی خۆماڵی و هاوردە و جێگیری نرخ و چاودێری کردنی بەروبوومەکان و جوڵەی بازاڕ و کرێکاران و کاسبکار و دوکاندارەکانی، عەلوەی هەولێری بەسەرکردەوە.

لەبەسەرکردنەوەکەیدا، پارێزگاری هەولێر بەوەکالەت، کۆگاکانی ھەڵگرتنی بەرھەمەكان و بەشەکانی ناو عەلوەی هەولێری بەسەرکردەوە و لەنزیکەوە لە کەم و کوڕی و پێداویستی و گرفتەکان و چۆنیەتی هێنان و ساخكردنەوەی بەرھەمی جووتیارانی ناوخۆی کۆڵییەوە، پاشان لەگەڵ کاسبکار و دوکاندار و کرێکاران بەدواداچوونی بۆ نرخی سەوزە و میوەی خۆماڵی و هاوردەی وڵاتان و خوار و ناوەڕاستی عێراق و بە بازاڕكردنی بەرھەمی جووتیاران و جێگیری نرخ و جموجۆڵی بازاڕەکە کرد و ڕایگەیاند: " گرنگیدان بە كەرتی كشتوكاڵ خاڵێكی گرنگی بەرنامەی کاری کابینەی نۆیەمی حکومەتی هەرێمی کوردستانە، هەر بۆیە ئێمە وەکو پارێزگای هەولێر بەهەموو شێوەیەک جەخت لە پاڵپشتی کردنی جوتیاران و كەرتی كشتوكاڵ دەکەینەوە و ئەوەشی لەتواناماندابێت دەیکەین بۆیان لە پێناوی خزمەتكردنی هاوشاریانی خۆمان، لەگەڵ ئەوەشدا ڕیگە بەهیچ کەس نادەین یاری بەنرخ و گرانکردنی بازاڕ و بارشانی هاولاتییان بکات".

ئینجا پارێزگاری هەولێر بەوەکالەت، بەیاوەری قائمقامی ناوەند و بەڕێوەبەری شارەوانی شەش، هەرلەنێو عەلوەی هەولێر سەردانی بەڕێوەبەرایەتی چاودێری کشتوکاڵ و دانانی نرخ و ئەنجومەنی گومرگ-عەلوەی هەولێری کرد.