لەهەولێر، بەئامادەبوونی پارێزگار، ئۆفیسی مانگی سوری تورکی کرایەوە

لەهەولێر، بەئامادەبوونی پارێزگار، ئۆفیسی مانگی سوری تورکی کرایەوە

سەرلەبەیانی ئەمرۆ یەکشەمە 2021.1.31، بەئامادەبوونی هێمن قادر، پارێزگاری هەولێر بەوەکالەت و هاکان کەراجای، کونسڵی گشتیی تورکیا لەهەولێر و موسا ئەحمەد سەرۆکی دەزگای خێرخوازیی بارزانی و ئایدن مەعروف، وەزیری هەرێم بۆ کاروباری پێکهاتەکان لە حکوومەتی هەرێم و بەڕێوەبەری پۆلیسی هەولێر و بەڕێوەبەری گشتیی کۆچ و کۆچبەران و وەڵامدانەوەی قەیرانەکان لەوەزارەتی ناوخۆ و بەڕێوەبەری گشتیی ڕێکخراوی مانگی سوری تورکی و سەرۆكی لقی هەولێری مانگی سووری عێراقی و ژمارەیەکی دیکە لە بەرپرسان و نوێنرانی مانگی سوری ئیماراتی و قەتەری، لەڕێورەسمێکدا، ئۆفیسی سەرەکی مانگی سوری تورکی لەنێو بارەگای لقی هەولێری مانگی سووری عێراقی کرایەوە.

لەڕێو رەسمەکەدا، هێمن قادر، پارێزگاری هەولێر بەوەکالەت لەووتارێکدا وێڕای بەگەرمی بەخێرهێنانی ئامادەبووان ڕایگەیاند: "خۆشحاڵین ئەمڕۆ بەشدارین لەکردنەوەی ئۆفیسی مانگی سوری تورکی کەبەهەماهەنگی لەگەڵ لقی هەولێری مانگی سوری عێراقی کراوەتەوە‌، بێگومان لەماوەی ڕابردوودا کارێکی زۆری مرۆیی و خێرخوازی و هاوکاری کردنی ئاواره ‌و لێقه‌وماوان لە شاری هەولێر ئەنجامدراوە، بەحوکمی ئەوەی لەدوای ساڵی 2013 و لەکاتی شەڕی تیرۆرستانی داعش و ئەو ڕووداوانەشی کە لەوڵاتی سوریا ڕوویاندا ژمارەیەکی ئیجگار زۆر ئاوارە و پەناهەندە ڕوویان لە هەرێمی کوردستان بەتایبەتی لەشاری هەولێر كردوو ئێستا لەسنووری پارێزگاکەمان نیشتەجێن، بۆ بەهانەوەچوونی ئەو ئاوارە و لێقەومانەش ڕێکخراو و کەسایەتییە خێرخوازییەکان و مانگی سوری تورکی و ئیماراتی و قەتەری بەهەماهەنگی لەگەڵ دەزگای خێرخوازی بارزانی ڕۆڵێکی باشیان گێڕا لەهاوکاریکردنی حکومەتی هەرێمی کوردستان، بەتایبەت لەکاتی سەرهەڵدانی ڤایرۆسی کۆرۆنا کە بەهۆی خۆپارێزی و ڕێکارە تەندروستییەکان تەواوی پەیوەندییە نێودەوڵەتییەکان و هاتنی ڕێکخراوەکان و یارمەتییە مرۆییەکان بۆ لێقەوماوان و کەمدەرامەتەکان وەستا، لەوکاتەوە بەسوپاسەوە مانگی سوری تورکی و قەتەری و ئیماراتی و عێراقی، ڕۆڵێکی زۆرباشیان گێڕا لەدابینکردنی پێداویستەکانی خۆراک و تەندروستی، هەربۆیە جارێکی تر پیرۆزبایی لە لقی هەولێری مانگی سوری عێراقی دەکەین بەبۆنەی کردنەوەی ئۆفیسێکیتر کە بەهۆیەوە دەتوانرێت زیاتر هەماهەنگ و هاوکاربن لەگەڵ دام و دەزگا و دامەزراوەکانی حکومەتی هەرێمی کوردستان، لەهەمانکاتدا سوپاس بۆ مانگی سوری تورکی و هەموو ئەوانەشی کەلەماوەی ڕابردوودا هاوکارمان بوونە".