پارێزگاری هەولێر، پێشوازى لە پارێزگاری ئازاربایجانی ڕۆژئاوا(ئورمیە)ی کرد
رۆژی سێشەممە 2022.2.22، ئومێد خۆشناو، پارێزگاری هەولێر، لەدیوانى پارێزگا، پێشوازى لە محەمەد سادق موعتەمدیان، پارێزگاری ئازاربایجانی ڕۆژئاوا(ئورمیە) و شاندێکى باڵای یاوەرى کرد.
لەدیدارەکەدا کەهەریەک لە نەسرووڵا ڕەشنودی، سەرکۆنسووڵی گشتی کۆماری ئیسلامی ئێران لە هەولێر و هەڵگورد شێخ نەجیب، سەرپەرشتیارى ئیدارەى سەربەخۆى سۆران و هێمن قادر و مەسعود کاڕەش، جێگرانى پارێزگارى هەولێر و نادر سادقى، جێگرى پارێزگارى ئورمیە بۆکاروباری ئابووری و کمال حسێن پور، نوێنەرى هەڵبژێردراوى پیرانشار و سردەشت لە پەلەمانی ئێران و عەبدوڵڵا ئاکرەیی، بەڕێوەبەری گشتیی پەیوەندییەکانی حکومەتی هەرێمی کوردستان لەگەڵ کۆماری ئیسلامی ئێران و ژمارەیەکی دیکە لە بەرپرسانی باڵای هەردوولا ئامادە بوون، پارێزگاری هەولێر وێڕاى بەگەرمى بەخێرهێنانى بەڕێزیان جەختی لە پتەوکردنی پەیوەندییەکانی نێوان هەردوو پارێزگا و بەهێزکردنی جموجۆڵی بازرگانی و ئابووری نێوان کۆماری ئیسلامی ئێران و هەرێمی کوردستان لەخاڵی سنووری حاجی ئۆمەران-تەمەرچین کردەوە.
پاشان گفتوگۆ لەبارەى لێکتێگەیشتنى (14) خاڵیەکەی نێوانیان کرا کە دوا بە دوای سەردانى بەڕێز پارێزگاری هەولێر و شاندی یاوەری بۆ کۆماری ئیسلامی ئێران بەمەبەستى بەهێزکردنى جوڵە و ڕهوشی بازرگانی لە دەروازەی سنووری نێودەوڵەتی حاجی ئۆمەران - تەمەرچین لە ڕێکەوتى 2021.12.26 لەنێوان هەردوولادا واژووکرا، هەردوولا خۆشحاڵى خۆیان نیشاندا کە دواى واژووکردنى ئەم یاداشتی لێکتێگەیشتنە جوڵەی بازرگانی لە هەردوو دەروازەی سنوور بەرەوپێشچوونى زۆرى بەخۆیەوە بینیووە و زۆربەى خاڵەکانى کەوتۆتە وارى جێبەجێکردنەوە.
لەکۆتایدا پارێزگاری ئازاربایجانی ڕۆژئاوا(ئورمیە) سوپاسى پارێزگارى هەولێرى کرد بۆ ئەو پێشوازییە گەرمەى لێیکرا و جەختى لەبەرە و پێشبردنی پەیوەندییەکان و هەماهەنگی و هاوکاری نێوان پارێزگای هەولێر و پارێزگای ئازاربایجانی ڕۆژئاوا(ئورمیە) کردەوە و ئامادەیی هەموو هاوکاری و ئاسانکارییەکی بۆ بەهێزکردنی جممجۆڵی بازرگانی لەدەروازەی سنووری حاجی ئۆمەران-تەمەرچین نیشاندا.