خەڵاتی رێزلێنانی خۆشەویستیی خەڵکی سلێمانی دەدرێتە پارێزگاری هەولێر

خەڵاتی رێزلێنانی خۆشەویستیی خەڵکی سلێمانی دەدرێتە پارێزگاری هەولێر

ئەمڕۆ شەممە 8-2-2020 ژمارەیەک گەنجی شاری سلێمانی پەیامی پارێزگای سلێمانی و خەڵاتی رێزلێنانی تەبایی و خۆشەویستیی خەڵکی سلێمانییان گەیاندە دەست د.فرسەت سۆفی، پارێزگاری هەولێر، هاوکات پارێزگاری هەولێریش پەیامی خۆشەویستی و برایەتی و بەیەکەوە کارکردن بۆ خەڵکی سلێمانی دەنێرێت.

دوای پێدانی پەیام و خەڵاتەکە بە پارێزگاری هەولێر، لە کۆنگرەیەکی رۆژنامەڤانیدا، هەوراز چنگیانی، بەناوی ئەو کۆمەڵە گەنجەوە رایگەیاند "خۆمان بە بەختەوەر دەزانین کە ئەمڕۆ لە خزمەت جەنابی پارێزگاری هەولێرداین، هەم وەکو گەنجانی کوردستان و گەنجانی هەولێر و سلێمانی پەیامی یەکڕیزی و خۆشەویستی و تەبایی هەولێر و سلێمانی پێشکەشی جەنابی پارێزگاری هەولێر بکەین، لە هەمان کاتیشدا پەیامی دەستنووسی پارێزگاری سلێمانی و خەڵکی سلێمانی کە گوزارشتە لە خۆشەویستی و تەبایی، پێشکەشی هەولێر و هەولێرییەکان و پارێزگاری هەولێر بکەین".

لە بەرامبەریشدا، د.فرسەت سۆفی، پارێزگاری هەولێر بەناوی خۆی و پارێزگای هەولێر و خەڵکی هەولێر سوپاس و پێزانین و رێزی زۆری بۆ پەیامی پارێزگای سلێمانی و پارێزگاری سلێمانی پیشاندا و رایگەیاند "منیش لێرەوە وەڵامی پەیامەکەی پارێزگاری سلێمانی دەدەمەوە، ئێمە لە قەڵا و منارەوە، لە هەولێری دێرینەوە، کە زیاتر لە شەش هەزار ساڵە لێرە ژیان هەیە، بە قەد خۆشەویستیمان بۆ قەڵا و منارە، سڵاو و رێز و خۆشەویستیمان هەیە بۆ شاری سلێمانیی هەڵمەت و قوربانی، شاری سلێمانی پایتەختی رۆشنبیری، ئەو شارەی لەپێناو رزگاریی گەلی کوردستان لە مێژووی ئازادیخوازی گەلەکەمان رۆڵ و پێگەیەکی گەورەی هەبووە".

هەروەها پارێزگاری هەولێر رایگەیاند "سلێمانی، هەولێر، کەرکووک، دهۆک، هەڵەبجە و هەموو شارەکانی دیکەی کوردستان و هەموو پارچەکانی دیکەی کوردستان ئامانج و خەمێکی هاوبەش کۆماندەکاتەوە، هەموومان بە ئومێد و هیوا و ئاواتێکی هاوبەشەوەین".

د.فرسەت سۆفی دووپاتیکردەوە، هەرچی لە توانایدا هەبێت وەکو پارێزگاری هەولێر بۆ دروستکردنی پردی پەیوەندی و یەکڕیزی و تەبایی و خۆشەویستی لەنێوان هەموو شارەکانی کوردستان و بەتایبەتی هەولێر و سلێمانی دەیکات و دەڵێت "یەک ساتیش کۆڵ نادەین، هەموو تواناکانی خۆشمان دەخەینەگەڕ لەپێناو ئەوەی خەڵکی خۆشەویستیی هەولێر و سلێمانی و هەموو شارەکانی دیکەی کوردستان بەیەکەوە بتوانین لە ئەنجامدا ئەزموونەکەمان و هەرێمەکەمان بە سەرکەوتوویی و ئاشتی بهێڵینەوە، هەموو ئاواتەکانی شەهیدان و پێشمەرگە قارەمانەکان بەدیبهێنین".

پارێزگاری هەولێر سوپاسی ئەو گەنجانەی کرد لە بەرامبەر ئەو کارەیان و گوتیشی "کاتێک گوێبیستی قسەکانیان دەبین و ئەو هەوڵانەی ئەوان دەبینین، بۆمان دەردەکەوێت کە نەوەیەک بەڕێوەیە ئەو وڵاتە لە سایەیدا دەتوانێت سەقامگیر بێت و ئاشتی تێیدا بەرقەرار بێت".