پارێزگاری هەولێر، هاوڕێ لەگەڵ سەرۆكی دەستەی وەبەرهێنان، ناوچەی پیشەسازی گەورەی تیماری بەسەرکردەوە

پارێزگاری هەولێر، هاوڕێ لەگەڵ سەرۆكی دەستەی وەبەرهێنان، ناوچەی پیشەسازی گەورەی تیماری بەسەرکردەوە

دوێنێ پێنج شەمە 2020.9.17، د.فەرسەت سۆفی پارێزگاری هەولێر، هاوڕێ لەگەڵ بەڕێز محەمەد شوکری سەرۆكی دەستەی وەبەرهێنانی حکومەتی هەرێمی كوردستان، بەیاوەری مەسعود کاڕەش جێگری پارێزگاری هەولێر و ژمارەیەکی دیکە لە بەرپرسانی دەستەی وەبەرهێنان، ناوچەی پیشەسازی گەورەی تیماری بەسەرکردەوە.

لەبەسەرکردنەوەکەیاندا، پارێزگاری هەولێر لەگەڵ سەرۆكی دەستەی وەبەرهێنانی حکومەتی هەرێم، هەریەک لە کارگەکانی، (پۆلتێکس، بۆ بەرهەمهێنانی ئاسن) و (کارگەی فابیاب، بۆ دروستکردنی کارتۆن و کیسەی کاغەز) و (کارگەی فۆلمێکس، بۆ دروستکردنی مافور و دۆشەکی سپرینگ و مۆبیلیات) و (کارگەی شوف، بۆ بەرهەمهێنانی موادی پاککەرەوە) و (کۆمەڵگای پیشەسازی کۆمپانیایی زێڕ، بۆ بەرهەمهێنانی کەرستەی خۆراک)یان بەسەرکردەوە و لەنزیکەوە لە چۆنیەتی کارکردن و ڕێژەی بەرهەمهێنان و بەبازاڕکردنی کاڵاکانیان کۆڵییەوە.

لەلایەن خۆیەوە پارێزگاری هەولێر، وێڕای دەست خۆشی لەخاوەنی کارگەکان، هیوای سەرکەوتنی لەکارەکانیان بۆ خواستن و تەئکیدی لەسەر ئەوە کردەوە، وەکو پارێزگای هەولێر لەپێناوی خزمەتکردنی شارەکامان و گەشەپێدانی زیاتری ئابووری و بەرهەمهێنان و پیشەسازیی، بەهەموو شێوەیەک هاوکار و پشتیوانی پڕۆژەکانتانین و ئامادەین بۆ چارەسەرکردنی هەموو کێشە و گرفتەکانتان، دڵنیاشی کردنەوە لەگەڵ سەرجەم لایەنە پەیوەندیدارەکان لەتوێژینەوە و بەدواداچووندان بۆ گەیاندنی خزمەتگوزاری بە ناوچەی پیشەسازی گەورەی تیمار.