پارێزگاری هەولێر، پێشوازی لە وەزیری ڕۆشنبیريی و گەشت و گوزار و شوێنەواری عێراق و شاندێکی یاوەری کرد

پارێزگاری هەولێر، پێشوازی لە وەزیری ڕۆشنبیريی و گەشت و گوزار و شوێنەواری عێراق و شاندێکی یاوەری کرد

ئێوارەی ئەمڕۆ شەمە 2020.9.26، د.فەرسەت سۆفی، پارێزگاری هەولێر، لەدیوانی پارێزگا، پێشوازیکرد لە د.حەسەن نازم، وەزیری ڕۆشنبیریی و گەشت و گوزار و شوێنەواری حکومەتی عێراق و شاندێکی یاوەریی کە پێکهاتبوو لە فەلاح حەسەن شاکر بەڕێوەبەری گشتیی پەیوەندییە ڕۆشنبیرییەکانی وەزارەت و د.عەبدولکەریم سەرۆکی ڕاوێژکارانی سەرۆکایەتیی ئەنجومەنی وەزیرانی عێراق.

لەسەرەتايی دیدارەکەدا، وەزیری ڕۆشنبیريی و گەشت و گوزار و شوێنەواری عێراق، سوپاسی پارێزگاری هەولێری کرد بۆ ئەو پێشوازییەی کە لێیکرا و ڕایگەیاند: "خۆشحاڵم کە سەردانی هەولێرم کردووە، ئەو شارەی ماوەیەک لێی ژیاوم"، پاشان باسی لە پەیوەندییە ڕۆشنبیرییەکانی هەرێمی کوردستان و عێراق کرد و تیشکی خستە سەر ڕۆڵی بەرچاوو و دیاری ڕۆشنبیر و ئەدیبانی کورد لە مێژووی دەوڵەتی عێراق و وتی: "بەداخەوە لەعێراق بەدرێژایی مێژوو نەمانتوانیوە وەک پێویست سود لەئەزموونی ئەدەبی و ڕۆشنبیریی کوردی وەربگرین، ئەویش بەهۆی وەرنەگێڕانی ئەدەبیاتی کوردی بۆ سەر زمانی عەرەبی"، هۆکارەکەشی گەڕاندەوە بۆ ئەوەی بەدرێژایی چەندین ساڵ دەسەڵاتداریەتی بەعس ڕێگربووە لە وەرگێڕان و پەخش و بڵاوکردنەوەی ئەدەبیاتی کوردی لەنێو ئەدەبیاتی عەرەبی لە عێراق، لەوبارەیەوە ڕایگەیاند: "بەڵام ئیتر کاتی ئەوەیە کار بۆ ئەوە پرسە بکەین، چونکە میللەتی کورد خاوەنی گەنجیینەیەکی دەوڵەمەندە لە ئەدەب و ڕۆشنبیریی".

لەلایەن خۆیەوە پاریزگاری هەولێر، وێڕای بەخێرهێنانی گەرمی وەزیری ڕۆشنبیریی و گەشت و گوزار و شوێنەواری حکومەتی عێراق و شاندی یاوەریی، سەرەتا باسی لە هەنگاوەکانی نۆژەنکردنەوە و گەشەپیدانی قەڵاتی هەولێر کرد و وتی: "هەنگاوی زۆر باشمان ناوە، بەڵام بەهۆی دۆخی دارایی و ڕێکارەکانی خۆپارێزی لە کۆرۆنا لەماوەی ڕابردوودا بەشێک لەکارەکان سستییان تێکەوتووە، ئێستا دووبارە دەستمان بەهەنگاونان کردۆتەوە و هیوای خوازین لەوپرسەدا وەزارەتی ڕۆشنبیریی و گەشت و گوزار و شوێنەواری عێراق هاوکار و هەماهەنگی پارێزگای هەولێر بێت".

پارێزگاری هەولێر هەروەها ڕایگەیاند: "خۆتان دەزانن هەولێر یەکێکە لەشارە مێژووی و دێرینەکانی ناوچەکە و بەوە بەناوبانگە کە شاری پێکەوە ژیانی نەتەوەیی و ئایینەکانە و خاوەنی ڕۆشنبیرییەکی هەمەچەشنە، بۆیە گرنگی و تایبەتمەندیی خۆی هەیە، هیواداری ئەم سەردانەی بەڕێزتان بۆ شارەکەمان ببێتە هانگاوێک بۆ گەشەپێدانی زیاتری پەیوەندییەکان و هەماهەنگی و هاوکاری نێوانمان لەپێناو خزمەتکردنی زیاتر شاری هەولێر، لەڕووی فەرهەنگی و کەللتوری و ڕۆشنبیریی و نۆژەنکردنەوە و پەرەپێدانی شوێنەوارەکانی".

پاشان پارێزگاری هەولێر، هاوڕێ لەگەڵ وەزیری ڕۆشنبیریی و گەشت و گوزار و شوێنەواری حکومەتی عێراق و شاندی یاوەريی، قەڵايی هەولێرییان بەسەرکردەوە و چۆنیەتیی پەرەپێدان و نۆژەنکردنەوەی قەڵايی هەولێر و شوێنەوارەکانییان خستە بەرباس.