پارێزگاری هەولێر، لە شاری وان سەردانی بارەگای سەرەکیی ئاکپارتی کرد

پارێزگاری هەولێر، لە شاری وان سەردانی بارەگای سەرەکیی ئاکپارتی کرد

ئەمڕۆ دووشەممە 2026.6.8، ئومێد خۆشناو، پارێزگاری هەولێر، بەیاوەری هەڵگورد شێخ نەجیب، سەرپەرشتیاری ئیدارەی سەربەخۆی سۆران، لە چوارچێوەی سەردانە فەرمییەکەیدا بۆ شاری وان، سەردانی بارەگای سەرەکیی پارتی داد و گەشەپێدان (AK Parti)، و لەلایەن عەبدوالئەحەد ئارڤاس، سەرۆکی لقی وانی پارتی داد و گەشەپێدان (AK Parti) پێشوازی لێکرا.

لە دیدارەکەدا، کە هەریەک لە جێگری سەرپەرشتیاری ئیدارەی سەربەخۆی سۆران و سەرۆکی شارەوانی و بەڕێوەبەری گشتیی گەشت و گوزار و نوێنەرانی دەزگای خێرخوازی بارزانی و ژوورە بازرگانییەکان ئامادەی بوون، تیشک خرایە سەر پەیوەندییە مێژوویی و کۆمەڵایەتییەکانی نێوان هەرێمی کوردستان و کۆماری تورکیا و گفتوگۆ لەسەر گرنگیی سەقامگیریی سیاسی و ئابووریی ناوچەکە و ڕۆڵی پارت و لایەنە سیاسییەکان لە بەهێزکردنی پردی پەیوەندیی و پەرەپێدانی هەماهەنگیی نێوان هەردوولا کرا.

لە تەوەرێکی تری دیدارەکەدا، هەردوولا دوپاتیان لەسەر ئاسانکاریی زیاتر لە دەروازە سنوورییەکان بە مەبەستی بووژانەوەی ئابووریی نێوان هەردوولا و پەرەپێدانی چالاکییە ڕۆشنبیری و کۆمەڵایەتییە هاوبەشەکان کردەوە.

لەلایەن خۆیەوە، پارێزگاری هەولێر، ئامادەیی پارێزگای هەولێری نیشاندا بۆ پێشکەشکردنی هەموو ئاسانکارییەک لەپێناو بەهێزکردنی پەیوەندییە گەشتیاری و بازرگانییەکانی نێوان هەولێر و پارێزگاکانی کۆماری تورکیا.