شاوێس.. لەچوارچێوەی هەوڵەكانی زیادکردنی ڕێژەی سەوزایی پارکێک کرایەوە

شاوێس..
لەچوارچێوەی هەوڵەكانی زیادکردنی ڕێژەی سەوزایی پارکێک کرایەوە

ئەمڕۆ سێشەممە 21ی تەمموزی 2026، لەژێر چاودێری ئومێد خۆشناو، پارێزگاری هەولێر و بە ئامادەبوونی دڵشاد هیرانی، بەڕێوەبەری فەرمانگەی ژینگەی هەولێر و زەندی جەبار، سەرۆکی شارەوانی شاوێس، لە چوارچێوەی هەوڵە بەردەوامەکانی حکومەتی هەرێمی کوردستان بۆ زیادکردنی ڕێژەی سەوزایی و گرنگیدانی زیاتر بە پاراستنی ژینگە، پارکی شاوێس کرایەوە.

ئەم پڕۆژە خزمەتگوزاری و ژینگەییە، لەسەر ڕووبەری ( 11,250 مەتری چوارگۆشە ) جێبەجێ کراوە، پڕۆژەکە بە هاوکاری و هەماهەنگی نێوان فەرمانگەی ژینگەی هەولێر و سەرۆکایەتی شارەوانی شاوێس و کۆمپانیای ئەسیۆرد (زین) بۆ پەیوەندییەکان ئەنجامدراوە، کە تێیدا لەسەر ڕووبەرێکی بەرفراوان نەمام و داری جۆراوجۆر چێندراون و شوێنی حەوانەوە و دانیشتنی گونجاو بۆ خێزان و هاوڵاتیانی ناوچەکە دابین کراوە.

لە کاتی کردنەوەی پارکەکەدا، پارێزگاری هەولێر ڕایگەیاند، پەرەپێدانی سێکتەری خزمەتگوزاری و بەرزکردنەوەی ستانداردی ژینگەیی لە قەزا و ناحیەکانی دەوروبەری هەولێر لە ئەولەویەتی کارەکانیاندایە، ئەم هەنگاوەش خزمەتێکی بەرچاو بە تەندروستی گشتی و دروستکردنی کەشێکی لەبار بۆ حەوانەوەی هاوڵاتیان دەگەیەنێت.