هەولێر... یانەی شەترەنجی خانزاد، بەهاوکاری فیدراسیۆنی شەترەنجی لقی هەولێر، میوانداری و سەرپەرشتی پاڵەوانێتییەکانی شەترەنجی عێراق دەکات

ئێواره‌ی ئه‌مرۆ چوارشه‌ممه‌ 14.10.2026 بە ئامادەبوونی ئومێد خۆشناو، پارێزگاری هەولێر، سەردار ئیسماعیل بەرێوەبەری گشتی وەرزش، زافر ئەمیر سەرۆکی فیدراسێۆنی شەترەنجی عێراق، د. دڵزار حەمە سالح سه‌رۆكی یانەی شەترەنجی خانزاد، یاریزان و هه‌واداران، پاڵەوانێتیی پێش كۆتایی شەترەنجی عێراق A ـی ئاستی تەمەنە جیاوازه‌کان، بە بەشداریی یاریزانانی کوڕ و کچ لە شاری هەولێر به‌رێوه‌چوو.
ئەم پاڵەوانێتییە لەلایەن یەکێتیی شەترەنجی عێراقەوە، بە هاوئاهەنگیی یانەی شەترەنجی خانزاد، بەڕێوە دەبرێت و یانە و یاریزانانی بەشداربوو لە شارە جیاوازەکانی عێراقەوە تێیدا بەشداری دەکەن.
لەو پاڵەوانێتییەدا، کە لە یانەی خانزاد بەڕێوە دەچێت، نزیکەی 80 یاریزانی کوڕ و کچ لە تەمەنە جیاوازەکان کۆبوونەتەوە، بۆ ئەوەی لە کەشێکی وەرزشی و ڕکابەرییەکی یاریزانانەدا تواناکانی خۆیان پیشان بدەن. پاڵەوانێتییەکە بە سیستەمی سویسری و لە نۆ ڕاونددا بەڕێوە دەچێت.
بەڕێوەچوونی ئەم پاڵەوانێتییە لە هەولێر، لە چوارچێوەی گرنگیدان بە وەرزشی شەترەنج و پەرەپێدانی توانای یاریزانانی گەنج و دروستکردنی دەرفەتی ڕکابەریی وەرزشی لە نێوان یاریزانانی شارە جیاوازەکانی عێراقدایە.
شایانی باسە، یانەی خانزاد یانەیەکی تایبەتمەندە بە یاری شەترەنج لە شاری هەولێر، لە ساڵی ١٩٩٨ دامەزراوە و لە بواری پەرەپێدانی یاری شەترەنج و پشتگیریکردنی یاریزاناندا چالاکی دەکات. هاوكات خاوەنی پرۆژەی نیشتیمانی خوێندنی شەترەنجە لە قوتابخانەکانی پەروەردەو یانەیەکی دیارە لەسەر ئاستی هەرێمی کوردستان و عێراق، لەسەر ئاستی نێودەوڵەتی ناسراوە.