پارێزگارى هەولێر، پێشوازى لە باڵیۆزی نوێی چیك لەعێراق کرد

پێنجشەمە 2021.11.25، ئومێد خۆشناو، پارێزگارى هەولێر، لەدیوانى پارێزگا، پێشوازى لە پیتەر شتێپانیک، باڵیۆزی نوێی کۆماری چیک له‌ عێراق کرد .
لەدیدارەکەدا، پارێزگارى هەولێر وێڕاى بەگەرمى بەخێرهێنانى، بەبۆنەى دەستبەکاربوونی وەک باڵیۆزی کۆماری چیک لەعێراق پیرۆزبایی لێکرد و هیوای سەرکەوتنی بۆ خواست لە ئەرکەکانیدا و تەئکیدى لە پەرەپێدانى پەیوەندییە سیاسى و ئابوورى و بازرگانی و فەرهەنگى و کەللتورى و هونەرى نێوان کۆماری چیک و هەرێمی کوردستان کردووە.
لەلایەن خۆیەوە باڵیۆزی چیک لەعێراق تیشکى خستە سەر پەیوەندی دۆستانەی نێوان هەرێمی کوردستان و کۆماری چیک و ئامادەیی خۆیی و وڵاتەکەشی نیشاندا بۆ زیاتر بەرەوپێشبردنى پەیوەندییەکان لە هەموو بوارەکاندا بەتایبەتى لە کەرتى تەندروستى، ڕاشیگەیاند، لەم نزیکانە کونسڵى نوێى وڵاتەکەى لە هەولێرى پایتەخت دەست بەکار دەبێت و لەئێستاشدا بەمەبەستى دەرفەتى زیاترى ئاڵوگۆڕی بازرگانی و وەبەرهێنان، ئامادەکارى دەکەن بۆ هاتنى شاندێکی بازرگانی وڵاتى چیک بۆ هەرێمی کوردستان.
لەتەوەرێکى ترى دیدارەکەدا، باسکرد لە ڕۆڵى پێشمەرگە و سەرکەوتنی بەسەر تیرۆرستانى داعش و بەردەوامیدان بە پشتیوانیكردنی پێشمەرگە و ڕەوشى ناوچەکە بەگشتیى و بارودۆخى عێراق دوای هەڵبژاردنی ئەنجومەنی نوێنەران و پرسى پێکهێنانى حکومەتى نوێى عێراق و چەند تەوەرێکی دیکەی گرنگى ئابوورى و بازرگانى و پیشەسازى گفتوگۆى لەبارەوە کرا.