پارێزگاری هه‌ولێر، دواى نۆژەنکردنەوەى شه‌قامى مەولەوەى کە ناسراوە بەشەقامى سورچیانى بەسەرکردەوە

پارێزگاری هه‌ولێر، دواى نۆژەنکردنەوەى شه‌قامى مەولەوەى کە ناسراوە بەشەقامى سورچیانى بەسەرکردەوە

نیوه‌ڕۆى رۆژی یه‌كشه‌مه‌ 2021.12.12، ئومێد خۆشناو، پارێزگاری هه‌ولێر، به‌ یاوه‌ری مه‌سعود كاڕه‌ش، جێگری پارێزگار و نه‌به‌ز عه‌بدولحه‌مید، قائیمقامى ناوه‌ند و بەڕێوەبەرى شارەوانى دوو، شه‌قامى مەولەوەى کە ناسراوە بەشەقامى سورچیان، دواى نۆژەنکردنەوەى و تەواوبوون و کرانەوەى بەڕووى هاوڵاتییان بەسەرکردەوە.
دواى بەسەرکردنەوەى شەقامەکە پارێزگارى هەولێر، پیرۆزبایی لە کاسبکار و دوکانداران و دانیشتوانى ئەو گەڕەکە کرد و ڕایگەیاند: "ئه‌مڕۆ ئێمە لەئێوە خۆشحاڵترین بە نۆژەنکردنەوە و تەواوبوونى ئەم شەقامە و کرانەوەى بەڕووى هاوڵاتییان"، پارێزگارى هه‌ولێر هەروەها جه‌ختى له‌وه‌ كرده‌وه‌ كه‌ لەسەر ڕاسپاردەى جەنابى سەرۆکى حکومەتى هەرێمى کوردستان، پڕۆژەکان لەو شوێنانەوە دەست پێدەکەین کە گەڕەکى هەژارنشینن و کەمترین دەستى ئاوەدانى و خزمەتگوزارییان پێگەیشتووە کە بەداخەوە لەماوەى چەند ساڵى ڕابردوودا بەهۆى قەیرانى داراییەوە نەتوانراوە بەشێکى زۆر لەو شوینانەى کە پێویستیان بە نۆژەنکردنەوە و ئەنجامدانى پڕۆژەى خزمەتگوزارى هەبووە پڕۆژەیان تێدا ئەنجامبدرێت و وتى: "ئومێدى دەکەین لەداهاتوویه‌كى نزیكدا لەچوارچێوەى پڕۆژە خزمەتگوزارییەکانى حکومەتى هەرێمى کوردستان لەسنوورى پارێزگاى هەولێر، بتوانین پڕۆژەى دیکەى و خزمەتگوزارى زیاتر پێشكه‌ش بەهاوڵاتییانى سنوورى پارێزگاكه‌مان بکەین".
جێگه‌ى باسه‌، پڕۆژه‌ى چاككردن و نۆژه‌نكردنه‌وه‌ و فراوانكردنى شەقامی مەولەوەى کە ناسراوە بەشەقام و بازاڕى میللى سورچیان، پانییه‌كه‌ى(20)م و درێژییه‌كه‌ى (800)م و له‌به‌رواری (1-8-2021) ده‌ست به‌ جێبه‌جێكردنى كراو ماوەى چەند ڕۆژێکە بەكۆتایی هاتووە و بەڕووى هاوڵاتییان کراوەتەوە، به‌ گووژمه‌ى زیاتر لە (500.000.000) پێنج سه‌د ملیۆن دینار له‌سه‌ر بوودجه‌ى په‌ره‌پێدانى پارێزگاى هه‌ولێر جێبه‌جێکراوە، کە جگە لە قیڕتاوکردنى شەقامەکە و نۆژەنکردنەوەى ئاوەڕۆکەى، تۆڕى ئاو و کارەبا و دروستکردنى شوستەى بەشێوەیەکى سەردەمیان بۆ دروستکراوە.