پارێزگارى هەولێر، لەگەڵ بەشێک لەنوێنەرانى ڕێکخراوەکانى کۆمەڵگەى مەدەنى کۆبۆوە

رۆژی یەکشەممە 2022.3.6، ئومێد خۆشناو، پارێزگارى هەولێر، لەدیوانى پارێزگا، بەمەبەستى ئامادەکارى بۆ ئەنجامدانى (12) هەمین فیستیڤاڵی ئازادی و نەورۆز و بەرز ڕاگرتنى یادی ڕێككەوتننامەی 11ی ئادار و ڕزگاركردنی شاری هەولێر لە ڕاپەڕین، لەگەڵ نوێنەرانى لاوان، قوتابیان، ئافرەتان و بەشێک لە ڕێکخراوەکانى کۆمەڵگاى مەدەنى کۆبۆوە.
لەکۆبوونەوەکەدا، دواى ئەوەى باس لە ئامادەکارییەکان کرا لەلایەن پارێزگاى هەولێرەوە بۆ ئەنجامدانى (12) هەمین فیستیڤاڵی ئازادی و نەورۆز کرا کە بڕیارە لەڕۆژى هەینى11ی ئادارى ئەم ساڵ تا ئێوارەی نەورۆز بەردەوام بێت و زۆرترین چالاكی لە چوارچێوە فیستیڤاڵ لە چەندان شوێن، وەک قەڵاى هەولێر و پاركی شانەدەر و چەندین شوێنی تر پێشکەش بکرێت، تیشک خرایەسەر بەشداربوونى ڕێکخراوەکان لەگرتنە ئەستۆى چاوێریکردنى ڤیستیڤاڵ. لەلایەن خۆیانەوە، ئامادەبووان و نوێنەرى ڕێکخراوەکان هەموو ئامادەیەکى خۆیان بۆ ئەو مەبەستە نیشاندا.