پارێزگارى هەولێر: "ئەرکى ئێمەیە وەکو پارێزگا، خزمەتى هەموو یانەکان و وەرزشوانانى شارەکەمان بکەین"

ئێوارەى ئەمڕۆ سێشەممە 2022.9.27، ئومێد خۆشناو، پارێزگارى هەولێر، لەدیوانى پارێزگا، بەئامادەبوونى د.شاکر سمۆ، بەڕێوەبەرى گشتیى وەرزش لە وەزارەتى ڕۆشنبیرى حکومەتى هەرێم، پێشوازى لە حاکم جەمال، سەرۆکى یانەى وەرزشى هندرێن و دەستەى کارگێڕى و یاریزانانى یانەکە کرد، کە لە خولی نایابی کوردستان 2021-2022 پلەی دووەمیان بەدەستهێناوە.

لەدیدارەکەدا، پارێزگارى هەولێر، وێڕاى پیرۆزبایی لە یاریزانان، دەستخۆشى لە دەستەى کارگێڕى و ڕاهێنەران کرد کە توانیوایانە دەستکەوتێکى گەورە بۆ هەولێر بەدەستبهێنن، هەروەها تەواوى پاڵپشتیى و هاوکارى خۆى بۆ یانەکە و یاریزانانن دووپات کردەوە و ڕایگەیاند: "ئەو ئەنجامەى ئێوە بەدەستانهێناوە وەکو هەولێر و وەکو پارێزگا بەهى خۆمانى دەزانین، ئومێد دەکەین لەخولى داهاتوو نازناوى خولەکە بەدەست بهێنن، ئەرکى ئێمەیە وەکو پارێزگا خزمەتى هەموو یانەکان و وەرزشوانانى شارەکەمان بکەین و ئەوەى لەتواناماندابێت پشتیوان و هاوکارتان دەبین و لەگەڵتانین، هیوادارین هەولێر لە هەموو بوارەکانى وەرزش هەمیشە ئەنجامى باش بەدەستبهنێت".

پاشان لەلایەن بەڕێز پارێزگار و بەڕێوەبەرى گشتیى وەرزش لە وەزارەتى ڕۆشنبیرى و سەرۆکى یانەى وەرزشى هندرێن، خەڵاتى پارێزگاى هەولێر پێشکەش بە دەستەى ڕاهێنەران و یاریزانان کرا.