پارێزگارى هەولێر سەردانى ڕۆژنامەى (خەبات)ى کرد

ئەمڕۆ سێشەممە 2023.4.4، ئومێد خۆشناو، پارێزگارى هەولێر، بە مەبەستى گەیاندنى پیرۆزبایی بەبۆنەی (64)هەمین ساڵیادی بە ئاشکرا دەرچوونی ڕۆژنامەی (خەبات)، سەردانى رۆژنامەى خەباتى کرد و لە لایەن سەرنووسەر و بەڕێوەبەرى نووسین و نووسەر و ڕۆژنامەنووس و کارمەندان و دەستەى کارگێڕى ڕۆژنامە کە پێشوازى لێکرا.

لە سەردانەکەیدا پارێزگارى هەولێر وێڕاى پیرۆزبایی بە بۆنەى (64)هەمین ساڵیادی بە ئاشکرا دەرچوونی ڕۆژنامەی (خەبات) ئومێدی بەردەوامی و سەرکەوتنی زیاتری بۆ خواستن و تیشکى خستەسەر ئەوەى (خەبات) وەک ڕۆژنامەیەکی دێرین و تێکۆشەری کوردستان خاوەن مێژوویەکی پڕ لە سەروەریی و ناوێکی مەزنە لە بزوتنەوەی ڕۆژنامەگەریی کوردی و بزاڤی ڕزگاریخوازیی گەلی کوردستان. ئاماژەشى بەوەدا کە دەیان ساڵە خەبات وەک مینبەرێکی گەیاندنی هەق و ڕاستی لەناوەندی ڕۆژنامەگەری کوردیدا سەرباری هەموو هەوراز و نشێویەکان بەوپەڕی هەستکردن بە بەرپرسیاریەتی و متمانەوە لە سەنگەری پێشەوەی داکۆکیکردن بووە لە مافە ڕەواکانی گەلەکەمان، جگە لەوەش قوتابخانەیەکی گەورەی پێگەیاندنی چەندین ڕۆژنامەنووسی بەتوانا و لێهاتوو بووە کە ئێستا هەریەک لەوان خاوەنی پێگە و ناو و ڕۆڵی دیاری خۆیانن لەکوردستاندا.