بە ئامادەبوونی سەرۆکى حکومەتى هەرێم، بۆ یەکەمجار سیستەمی دیجیتاڵی مۆڵەتی شوفێری کارا کرا

ڕۆژی چوارشەممە 24ی ئابی 2022، بەڕێز مەسرور بارزانی، سەرۆکی حکوومەتی هەرێمی کوردستان سەردانی بەڕێوەبەرایەتی هاتوچۆی هەولێری کرد و سیستەمی دیجیتاڵی مۆڵەتی شوفێری خستە کار. بەڕێزان وەزیری ناوخۆ و پارێزگاری هەولێر یاوەری سەردانەکەی جەنابی سەرۆکی حکومەت بوون. لەو سەردانەیدا، وێڕای کردنەوەی سیستمەکە، جەنابی سەرۆکی حکومەت مۆڵەتی شوفێری خۆی نوێکردەوە و مۆڵەتی دیجیتاڵی بەدەستهێنا. دوای مەراسیمەکە وتەیەکی بۆ کەناڵەکانی ڕاگەیاندن پێشکەش کرد.
پوختەیەکە لە گوتەکانی سەرۆکی حکوومەتی هەرێمی کوردستان:
• ئەم سیستمە جێی دەستخۆشییە و سوپاسی وەزارەتی ناوخۆ دەکەم.
• ئەم سیستمە دەبێتە بنەمایەک بۆ کۆکردنەوەی داتای هاووڵاتییانی کوردستان.
• دەبێتە بنەمایەک بۆ خزمەتگوزارییەکانی تریش کە بەشێوەی ئەلیکترۆنی ئەنجام بدرێت.
• کۆکردنەوەی داتا لە هاووڵاتییان هاوکارییەکی زۆری حکوومەت دەکات بۆ ئەوەی بتوانێت خزمەتگوزارییەکانی تر بەخێرایی ئەنجام بدات، هاووڵاتییانیش زیاتر بتوانن سوود لەو جۆرە خزمەتگوزارییانە وەربگرن.
• ئێمە لە شێوازی بەکارهێنانی کاغەز و رۆتینێکی دوورودرێژ هاتین بۆ ئەوەی بەشێوەیەکی ئەلیکترۆنی وخێرا کارەکان ئەنجام بدەین.
• ئەمە جێی دەستخۆشییە و جێی ئومێدە، قۆناغێكی نوێ و سەردەمییانەیە بۆ ئەوەی لەمەودوا بەماوەیەکی خێراتر کاروباری هاووڵاتییان بەشێوەیەکی ئەلیکترۆنی ئەنجام بدرێن.
• دەستخۆشی لە هەموو ئەو بەڕێزانە دەکەم کە کاریان تێدا کردووە و پیرۆزباییش لە خەڵکی کوردستان دەکەم.
بۆ بەرچاوڕوونی هاووڵاتیان، ئەمەی خوارەوە جۆر و دابەشکاری نوێی مۆڵەتی شوفێرییە کە پێشتر تەنیا جۆری تایبەت و گشتی هەبوون. دوای گۆڕانکارییەکان، مۆڵەتی شوفێری بەم جۆرەی لە وێنەکە دیارە دابەش دەبێت.