پارێزگاری هەولێر، سەردانی ماڵی چاودێری بەساڵاچووانی هەولێری کرد
پارێزگاری هەولێر، سەردانی ماڵی چاودێری بەساڵاچووانی هەولێری کرد
ئەمڕۆ هەینی 2026.3.20، ئومێد خۆشناو، پارێزگاری هەولێر، بە مەبەستی گەیاندنی پیرۆزبایی جەژن و بەسەرکردنەوەیان، نیوەڕۆی یەکەم ڕۆژی جەژن سەردانی بەساڵاچووانی ماڵی چاودێری بەساڵاچووانی هەولێر کرد.
پارێزگاری هەولێر، كە هەریەك لە یوسف چاوشین، بەڕێوبەری گشتیی چاودێری و گەشەپێدانی کۆمەڵایەتی هەولێر و زەیتۆ تۆفیق، بەڕێوەبەری چاودێری کۆمەڵایەت و خەسرەو غازی، بەڕێوەبەری کاروباری ناوخۆ و هاوڕێ ئیحسان، بەڕێوەبەری لقی هەولێری کۆمەڵەی مانگی سووری عێراقی و ناز جەلال، بەرێوەبەری قەیرانەكان یاوەری بوون، وێرای دەستخۆشی لە سەنگەر جەمال، بەرێوەبەری ماڵی چاودێری بەساڵاچووانی هەولێر و کارمەند و سەرپەرشتیاران لە بەرامبەر ئەو ماندووبوونەی كە لە خزمەتکردنی بەساڵاچوواندا دەیکێشن، پیرۆزبایی جەژنی لە هەموو لایەك كرد و لە نزیکەوە گوێبیستی داواکاری و پێداویستییەکانی بەساڵاچوو بوو.
هەروەها جەختی لەوە کردەوە، کە بەسەرکردنەوەی ئەم توێژە و خزمەتکردنیان ئەرکێکی مرۆیی و ئەخلاقییە، و دەبێت هەمیشە هەست بەوە بکەن کە لە ناو خێزان و کەسوکاری خۆیاندا دەژین، ئاماژەی بەوەشدا دابینکردنی ژینگەیەکی ئارام و پڕ لە ڕێز و سۆز بۆ ئەوانە لە کارە لەپێشینەکانی پارێزگایە.
لەكۆتایشدا، دیاری و هاوکاری پارێزگای بەسەر بەساڵاچوواندا دابەشکرد و بە پێشکەش کردنی چەند سروتێکی ئاینی كەشەكە زیاتر ڕازێندرایەوە.
جێگەی باسە، ئەو دەستپێشخەرییەی پارێزگاری هەولێر لە ڕۆژانی جەژندا، وەک پەیامێکی وەفادارییە بۆ ئەو کەسانەی کە ساڵانێکی زۆر تەمەنیان بەسەر بردووە و ئێستاش لەو ماڵەدا پێویستیان بە سۆز و پشتیوانیی بەردەوام هەیە.
