بەگوژمەى زیاتر لە(2 ملیار دینار) دەستکرا بەقیڕتاوکردنى شەقامە ناوخۆییەکانی گەڕەکی هەولێری نوێ

سەرلەبەیانی ئەمڕۆ سێشەممە 2022.9.13، ئومێد خۆشناو، پارێزگاری هەولێر، بەیاوەرى مەسعود کاڕەش، جێگری پارێزگار، عەبدولواحید ئەحمەد، سەرۆکی شارەوانی هەولێر و بەڕێوەبەری شارەوانی سێ و ژمارەیەکى دیکە لە ئەندازیاران، بەمەبەستى لەنزیکه‌وه‌ ئاگاداربوون لە چۆنیەتى بەڕێوەچوونى کارەکان، پڕۆژەى دروستکردن و قیرتاوکردنى شەقامە ناوخۆییەکانى گەڕەکی هەولێرى نوێ بەسەرکردەوە، کە بەشێکى لەسەر بودجەى پەرەپێدانى پارێزگاى هەولێر و بەشێکى لەسەر بودجەى داهاتى 15% سەرۆکایەتى شارەوانى هەولێر، بەگوژمەى (2 ملیار و 112 ملیۆن و 125 هەزار دینار) لەڕێگەى بەڵێندەرایەتى جێبەجێ دەکرێت.

پارێزگارى هەولێر دواى بەسەرکردنەوەى پڕۆژەکە، دەستخۆشی لە ئەندازیار و کرێکار و سەرپەرشتیارانى پڕۆژەکە کرد وڕایگەیاند: گەڕەکى هەولێرى نوێ یەکێک بوو لەو شوێنانەى پێویستى بە ئاوڕلێدانەوەى زیاتر هەبوو، بەتەوابوونى ئەم پڕۆژانەش هیچ شوێنێکى ئەم گەڕەکە نەماێنێت کە قیڕتاونەکرابێت.

گوتیشى: "دڵنیایی بە هاوڵاتییانى خۆشەویستى شارەکەمان دەدەین، لەبودجەى پەرەپێدان و بودجەى سەربار و هەموو ئەو بودجانەى لەبەردەستدان، ئومێد دەکەین لەماوەى ئەمساڵدا سەرجەم ئەو پڕۆژانەى کە ماون و ئەوانەشى لەپلان و بەرنامەمان داناوە وەکو خۆى جێبەجێبکرێت، بەپشتیوانى خوداى گەورە و ئەو ئیمکانیاتەى لەبەردەستماندایە هەموو ئەو شوێن و ناوچە و سنوورانەى کە پێویست بکات دەستى خزمەتگوزارى پێبگات بەبێ جیاوازى لەنێوان شار و دەرەوەى شار و بە شێوەیەکى یەکسان دەستى ئاوەدانى و خزمەتگوزاریى دەگەێنین، بەڵام ئەوەش بە ڕۆژێک و دوو ناکرێت چونکە بودجە و کاتى پێویستە".

جێگەى باسە، پڕۆژەى دروستکردن و قیرتاوکردنى شەقامە ناوخۆییەکانى گەڕەکی هەولێرى نوێ 3 پڕۆژەیە بەمشێوەیەى لاى خوارەوە:-
یەکەم/ قیرتاوکردنی 33 شەقام بە چینی ستابلایزەر به‌درێژی 6کم.
دووەم/ قیڕتاوکردنى 18 شەقامى دیکە بە درێژى 3 کم .
سێیەم/ قیرتاوکردنى شەقامێک بەدرێژى 400م.
کۆى گشتى پڕۆژەکان 52 شەقامى ناوخۆیى گەڕەکى هەولێرى نوێیە بەدرێژى 9,400 کم و بەگوژمەى (2 ملیار و 112 ملیۆن و 125 هەزار دینار) لەسەر بوجەى پەرەپێدانى پارێزگاى هەولێر دەست بەجێبەجێکردنیا کرایەوە.