لە سەر فەرمانى سەرۆکى حکومەتى هەرێم، ئامانجى حکومەت ڕەخساندنى زەمینەیەکى باشترە بۆ وەبەرهێنانى بیانى لە هەرێمى کوردستان
دوابەدواى بەشدارى سەرۆکى حکومەتى هەرێمى کوردستان لە کۆڕبەندى ئابوورى داڤۆس و دیداریان لەگەڵ چەندین کەسایەتى ئابوورى و بەرپرسانى وڵاتان، فەرمانگە و لایەنە پەیوەندیدارەکانى حکومەتى هەرێمى ڕاسپارد، لە دۆخى وەبەرهێنانى بیانى لە هەرێمى کوردستان بکۆڵنەوە و لە نزیکەوە سەردانیان بکرێت، لەو چوارچێوەیەشدا ئەمڕۆ چوارشەممە 2023.1.25، ئومێد خۆشناو، پارێزگارى هەولێر و د. محەمە‌د شوکرى، سه‌رۆکى ده‌سته‌ى وه‌به‌رهێنانى حکومه‌تى هه‌رێم، بە یاوەرى ئۆلیڤیێ دێکۆتینی، کونسڵى گشتیى وڵاتى فەرەنسا لە هەولێر و خالید ئەلشەمرانی، جێگری سەرکونسڵی عەرەبستانى سعودییە لە هەولێر، سەردانى کارگەی (صافی دانون)یان کرد لە هەولێر، کە وەبەرهێنانێکى هاوبەشى(سعودى-فەرەنسییە) و لەساڵى 2014 وە بەرهەمەکانى لە هەرێمى کوردستان و سەرجەم پارێزگاکانى ترى عێراق دەخاتە بازاڕەوە.
لە کۆبوونەوەیەکدا، هەریەک لە پارێزگارى هەولێر و سه‌رۆکى ده‌سته‌ى وه‌به‌رهێنانى حکومه‌تى هه‌رێم، لەگەڵ سەرپەرشتیار و بەڕێوەبەران و ئەندازیارانى کارگەکە لە نزیکەوە لە پێداویستى و کێشە و کەم و کوڕیی و ئەو خزمەتگوزاریانەى کە پێویستە حکومەتى هەرێم بۆیان دابین بکات کۆڵییەوە و ڕایانگەیاند: "لە سەر فەرمانى ڕێزدار مەسرور بارزانى، سەرۆکى حکومەتى هەرێمى کوردستان، ئامانجى حکومەت ڕەخساندنى زەمینەیەکى باشترە بۆ وەبەرهێنانى بیانى لە هەرێمى کوردستان، لەوبارەیەشەوە ئامادەیی خۆیان نیشاندا بۆ چارەسەرکردنى هەموو ئەو کەم و کوڕى و خزمەتگوازریانەى کە پێویستە بۆیان دابین بکرێت، پاشان لە لایەن سەرپەرشتیارانى کارگەکەوە سەبارەت بە هێڵی بەرهەمهێنانی کارگەکە و چۆنیەتی کارکردن و جۆرو ڕێژەی بەرهەمهێنانی ڕۆژانە و چۆنیەتی بەبازاڕکردنی کاڵاکانیان کورتەیەک پێشکەش کرا.
لە کۆتایشدا، پارێزگارى هەولێر و سه‌رۆکى ده‌سته‌ى وه‌به‌رهێنانى حکومه‌تى هه‌رێم و بەیاوەرى کونسڵى گشتیى وڵاتى فەرەنسا لە هەولێر و جێگری سەرکونسڵی عەرەبستانى سعودییە لە هەولێر، سەرجەم بەشەکانى کارگەکەیان بەسەرکردەوە.