ناشفیل بە ئاڵاى پیرۆزى کوردستانەوە پێشوازى لە شاندى پارێزگاى هەولێر دەکات

ناشفیل بە ئاڵاى پیرۆزى کوردستانەوە پێشوازى لە شاندى پارێزگاى هەولێر دەکات

لە لایەن شارەوانى و ئیدارەى شارى ناشفیلى ویلایەتى تێنسى ئەمریکا کە بە "کوردستانى بچووک" ناسراوە، بۆ پێشوازیکردن لە پارێزگارى هەولێر و شاندى یاوەرى و وەک ڕێزگرتنێک لە هاوکارى و هەماهەنگى نێوان هەردوولا و بەبۆنەى واژووکردنى ڕێککەوتنامەى دەستەخوشکى شارەکەیان لەگەڵ هەولێرى پایتەختى هەرێمى کوردستان، پردەى 'کۆریان ڤێتریانز'ى کە یەکێکە لە پردە سەرەکى و بەناوبانگی شارەکەیان بە ئاڵای پیرۆزى کوردستان ڕووناککردەوە.

ئەمڕۆش پێنجشەممە 2023.9.7، ئومێد خۆشناو، پارێزگارى هەولێر بە یاوەرى جۆن کوپەر، مایەری شاری ناشفیل و تریفە عەزیز، نوێنەرى حکومەتى هەرێمى کوردستان لە ئەمریکا و شاندى یاوەرى، ئەو پردەیان بەسەرکردەوە، لەوبارەیەشەوە پارێزگارى هەولێر سوپاسى شارەوانى و ئیدارەى شارەکەى کرد بۆ بەرز ڕاگرتنى ئاڵاى پیرۆزى کوردستان و ڕایگەیاند: "ڕووناککردنەوەى ئەو پردە بە ئاڵاى پیرۆزى کوردستان لە لایەن ئیدارەى و شارەوانى شارى ناشفیلى ویلایەتى تێنسى ئەمریکا و یەکێک لە گەورەترین وڵاتانى دونیا، ڕێزگرتنە لە خەبات و قوربانیدانى گەلى کوردستان و خوێنى شەهیدان و ئەزموونى هەرێمى کوردستان".

جێگەى باسە، پردەى 'کۆریان ڤێتریانز'ى کە یەکێکە لە پردە سەرەکی و بە ناوبانگى شارى ناشفیل، دواى ڕووناککردنەوەى بە ئاڵاى پیرۆزى کوردستان، ژمارەیەکى زۆر لە گەشتیاران وێنەى یادەوەریان لەگەڵ ئاڵاى پیرۆزى کوردستان دەگرت.