ئەمساڵ.. زۆرترین قوتابخانە لە سنوورى پارێزگای هەولێر دروستدەکرێت
ئەمساڵ..
زۆرترین قوتابخانە لە سنوورى پارێزگای هەولێر دروستدەکرێت
ئەمڕۆ یەکشەممە 2024.1.14، لەسەر ڕاسپاردەى مەسرور بارزانى، سەرۆکى حکومەتی هەرێمی کوردستان و لەچوارچێوە گرنگیدانى کابینەی نۆیەم بە کەرتى پەروەردە و فێرکردن و فهراههمكردنی كهشێکى گونجاوی خوێندن بۆ قوتابیان، هەریەک لە د.ئالان حەمە سەعید، وەزیرى پەروەردە و د.محەمەد شوکرى، سەرۆکى دەستەى وەبەرهێنانى حکومەتى هەرێم و ئومێد خۆشناو، پارێزگارى هەولێر، بە ئامادەبوونى مەسعود کاڕەش، جێگرى پارێزگار، سەبارەت بە پلان و بەرنامەى ئەمساڵ 2024ى پارێزگاى هەولێر بۆ ئەنجامدانى پڕۆژەى دروستکردنی چەندین قوتابخانە لە سنوورى پارێزگاى هەولێر کۆبوونەوەیەکیان ئەنجامدا.
لە کۆبوونەوەکەدا، تەئکید لە ڕاسپاردەى سەرۆکى حکومەت و ئهولهویهتی کارى کابینەى نۆیەمى حکومەتى هەرێمى کوردستان کرایەوە لە برەودانى زیاتر بەکەرتى پەروەردە و فێرکردن لە هەرێمى کوردستان بەگشتیى و هەولێرى پایتەخت بە تایبەتى، هەروەها دەستپێشخەرى و هەنگاوەکانى ئەو وەبەرهێنەر و خێرخوازانەش بەرز نرخێندرا کە لەساڵانى ڕابردوودا هاوکار و یارمەتیدەر و هەماهەنگکارى حکومەتی هەرێمی کوردستان بوونە لە ئەنجامدانی پرۆژەی هاوبەش و دروستکردنى قوتابخانە.
لە کۆتایشدا، کۆبوونەوە لە چوارچێوەى ئەو ئامادەکارى و پلان و بەرنامەیەى بۆ ئەمساڵ "2024" لەلایەن وەزارەتى پەروەردە و پارێزگاى هەولێر داڕێژراوە، بڕیاریدا بە دروستکردنى ژمارەیەکى زۆرى قوتابخانە بەپێى ئەو نەخشە و کوالێتیهى دیارى کراوە لە سنوورى پارێزگاى هەولێر، بە تایبەتى لەو ناوچە و گەڕەک و شوێنە هەژارنشینانهى كه پێویستن.