پارێزگاری هەولێر، سەردانى پارتى دیموکراتى کوردستانى تورکیای کرد
پارێزگاری هەولێر، سەردانى پارتى دیموکراتى کوردستانى تورکیای کرد
رۆژی پێنجشەممە 2024.5.2، ئومێد خۆشناو، پارێزگاری هەولێر، بە یاوەری شوان زراری، پەرلەمانتاری پێشووی پارتی و کارزان عبدولهادی، سەرۆکی شارەوانی هەولێر و هێمن موراد، بەڕێوەبەری گشتی کشتوکاڵی هەولێر و شاندى یاوەرى، لەشاری دیاربەکر سەردانى بارەگاى پارتى دیموکراتى کوردستانى تورکیای کرد و لەلایەن محەمەد ئەمین قارداش، سەرۆکى پارتى و ئەندامانى دیکەی مەکتەبى سیاسى پارتی پێشوازى لێکرا.
لە دیدارەکەدا، سەرۆکى پارتى وێراى بەگەرمى بەخێرێنانى پارێزگارى هەولێر، خۆشحاڵى خۆى بەسەردانەکەیان نیشاندا و جەختى لە بەروەپێشبردنى پەیوەندییەکان کردەوە.
لە لایەن خۆیەوە، پارێزگارى هەولێر ڕایگەیاند: "وەک شاندى هەرێمى کوردستان و پارێزگاى هەولێر لە ئامەدى سەربەرز و خۆشەویست، خۆمان بە خۆشحاڵ دەزانین لە خزمەتى هەڤاڵ و تێکۆشەرى گەلەکەمان حەمەدئەمین قارداش داین".
گوتیشى: "خەباتى ئێوە و تێکۆشینى ئێوە لاى ئێمە جێگەى ستایشە و بەڕێزەوە لە خەباتى ئێوە دەڕوانین ، لەگەڵ گەیاندنى سڵاوى سەرۆک بارزانى بەئێوەى وڵاتپارێز، هیواى سەرکەوتن و گەیشتن بە ئامانجەکانتان بۆ دەخوازین و هیوادارین وەک چۆن لە ڕابردوودا سیاسەتێکى نیشتیمانى و دروستان پەیڕەو کردووە، بە هەمانشێوە بەردەوامبن".
لە کۆتایشدا پارێزگارى هەولێر ڕایگەیاند: "پشتیوانیکردنى وڵاتپارێزان بەلاى ئێمەوە ئەرکە و دەخوازین ئێوەش وەک هێزێکى ڕەسەن و ڕاستەقینەى ناوچەکە بۆ دەستپێکردنەوەى پڕۆسەى ئاشتى لە تورکیا لە خەبات بەردەوامبن، کە تاکە ڕێگەیە بۆ چارەسەرى کێشەى کورد لە تورکیا و و نابێت هیچ دەرفەتێک بۆ ئاشتى لە تورکیا لە دەست بدرێت".
