پارێزگارى هەولێر، سەردانى فەرماندەیی ناوچەی یەکی هێزەکانی پاسەوانی سنوورى کرد
پارێزگارى هەولێر، سەردانى فەرماندەیی ناوچەی یەکی هێزەکانی پاسەوانی سنوورى کرد
ئەمڕۆ یەکشەممە 2024.3.10، ئومێد خۆشناو، پارێزگارى هەولێر، بەمەبەستى دڵنەوایی و سەرخۆشى بەهۆى ئەو ڕووداوەى کە سەرلەبەیانى ئەمڕۆ لە فەرماندەیی ناوچەی یەکی هێزەکانی پاسەوانی سنوور ڕوویدا و بەهۆیەوە سێ پاسەوانی فەرماندەییەکە گیانیان لەدەستدا، سەردانى فەرماندەیی ناوچەی یەکی هێزەکانی پاسەوانی سنوورى کرد و لەلایەن عەمید حسێن تەمەر، سەرۆکى ئەرکانى فەرماندەیی و ئەفسەر و پلەدارانى فەرماندەییەکەوە پێشوازى لێکرا.
لە دیدارەکەدا، پارێزگاى هەولێر، وێڕاى هاوخەمى و نیگەرانى بە هۆى ڕووداوەکەوە، پرسە و سەرخۆشى خۆى لە فەرماندە و ئەفسەر و پلەداران کرد و لەڕێگەى ئەوانیشەوە پرسە و سەرەخۆشى خۆى ئاراستەى کەس و کار و خانەوادەکانیان کرد و ڕایگەیاند: "کارەساتەکە دڵتەزێن بوو، لەدڵەوە نیگەران و خەمبارى کردین، هاوبەشى خەمتانین و خوداى گەورە شەهیدان بە بەهەشتى بەرینى خۆى شاد بکات و سەبر و ئارامى بە ماڵبات و کەس و کار و هاوڕێیانیان ببخشێت".
جێگەى باسە، سەرلەبەیانى ئەمڕۆ لە بارەگاى فەرماندەیی ناوچەی یەکی هێزەکانی پاسەوانی سنوور لە کانى قرژاڵەى سنوورى پارێزگاى هەولێر، لە کاتی پووچەڵکردنەوەی چەند مینێکی سەردەمی جەنگی عێراق – ئێران کە دوای پاککردنەوەی کێڵگەکان کۆکراونەتەوە، مینێک تەقیەوە و بەهۆیەوە سێ پاسەوانی فەرماندەییەکە گیانیان لەدەستدا.