پارێزگاری هەولێر و کونسڵى گشتیی کۆماری ئیسلامی ئێران لە هەولێر: جەختیان لە گرنگیی پتەوکردن و گەشەپێدانی زیاترى پەیوەندییە ئابوورى و بازرگانی و فەرهەنگى و کەلتوورییەكان کردەوە

Mar 13 2025

پارێزگاری هەولێر و کونسڵى گشتیی کۆماری ئیسلامی ئێران لە هەولێر:
جەختیان لە گرنگیی پتەوکردن و گەشەپێدانی زیاترى پەیوەندییە ئابوورى و بازرگانی و فەرهەنگى و کەلتوورییەكان کردەوە

ئەمڕۆ پێنجشەممە 2025.3.13، ئومێد خۆشناو، پارێزگاری هەولێر، سەردانى کونسڵخانەى گشتیی کۆماری ئیسلامی ئێران کرد و لەلایەن فەرامەرز ئەسەدی، سەرکونسڵی گشتیی کۆماری ئیسلامی ئێران لە هەولێر پێشوازیى لێکرا.

لە دیدارەکەدا، کە شاکر حسێن، بەرپرسى پەیوەندییەکانى نێوان هەرێمى کوردستان و کۆمارى ئیسلامى ئێران و جاجى ئیبراهیم گەردى، نوێنەرى ژوورى بازرگانى و پیشەسازیی هەولێر ئامادەى بوو، هەردوولا جەختیان لە گرنگیی پتەوکردن و گەشەپێدانی زیاترى پەیوەندییە ئابوورى و بازرگانی و فەرهەنگى و کەلتووریەکانى نێوان کۆماری ئیسلامیی ئێران و هەرێمی کوردستان کردەوە.

پاشان، پارێزگارى هەولێر بەبۆنەى دەستبەکاربوونى وەک سەرکونسڵ پیرۆزبایی لە کونسوڵی گشتیی کۆمارى ئیسلامى ئێران کرد و هیوای سەرکەوتنی لە ئەرکەکەیدا بۆ خواست و ئامادەیی هەموو هاوکارى و هەماهەنگیەکى نیشاند بۆ سەرخستنى کارەکانی.

لە بەرامبەردا سەرکونسڵی کۆماری ئیسلامی ئێران، وێڕاى بەخێرهێنان، سوپاسی پارێزگاری هەولێر و ئیدارەی پارێزگاى هەولێری کرد بۆ ئەو پەیوەندییە و هەماهەنگی و هاوکاری و ئاسانکارییانەی کە پێشکەشی کونسڵخانەى وڵاتەکەیان کردووە.

دواتر، تیشک خرایە سەر ڕێککەوتنامەى نێوان پارێزگاى هەولێر و پارێزگای ئازاربایجانی ڕۆژئاوا (ورمێ) و هەردوولا خۆشحاڵی خۆیان نیشاندا لە بەرامبەر جێبەجێکردنى تەواوى خاڵەکانى ڕێککەوتنامەکە، کە لە داوای واژووکردنى زۆربەی ئەو کێشە و گرفتانەى لە ماوەى ساڵانى ڕابردوو لە هەردوو دەروازەى نێودەوڵەتى ( تەمەرچن - حاجى ئۆمەران ) هەبوونە کۆتاییان پێهاتووە، هەروەها گفتوگۆ لە بارەى ئامادەکارییەکان بۆ سەردانیکردنى پارێزگارى هەولێر و شاندى یاوەرى بۆ کۆمارى ئیسلامى ئێران و کۆبوونەوەى لەگەڵ هەرسێ پارێزگارى ( ئازاربایجانى ڕۆژئاوا و کرماشان و سنە ) و بەشداریان لە کۆبوونەوەى فراوانى پارێزگارەکان کرا، کە بڕیارە لە دواى جەژنى ڕەمەزانى پیرۆز ئەنجامبدرێت.

لە تەوەرێکى ترى دیدارەکەدا، باس لە ڕەوش و جوڵەى بازرگانى نێوان هەرێمى کوردستان و کۆمارى ئیسلامى ئێران کرا، لەوبارەیەشەوە ئاماژە بە کێشەى بارزگانان سەبارەت بە هاوردەکردن و ترانزێدى ئاژەڵى زیندوو کرا، کە بەپێى ڕێککەوتنێکى نێوان بەغدا و تاران ئاستەنگى زۆریان بۆ دروست بووە، بۆ ئەو مەبەستەش کونسڵى گشتیى کۆمارى ئیسلامى ئێران جەختى لە چارەسەرکردنى کێشەکە لە زوترین کاتدا کردەوە.

لە کۆتایدا سەرکونسڵی گشتیی کۆماری ئیسلامی ئێران لە هەولێر، سوپاسى سەردانەکەى پارێزگارى هەولێرى کرد و جەختى لەبەرە و پێشبردنی هەماهەنگی و هاوکاری نێوان پارێزگای هەولێر و کونسڵخانەى گشتیى کۆمارى ئیسلامى ئێران لە هەولێر کردەوە و ئامادەیی هەموو هاوکاری و ئاسانکارییەکی بۆ بەهێزکردنی پەیوەندییەکان و باشترکردنى جم و جۆڵی بازرگانی لە نێوان کۆماری ئیسلامیی ئێران و هەرێمی کوردستان نیشاندا.