کۆتایی بە خولی پێنجەمی تۆپی پێی سەرۆکایەتی شارەوانی هەولێر هات

کۆتایی بە خولی پێنجەمی تۆپی پێی سەرۆکایەتی شارەوانی هەولێر هات

ئەمشەو چوارشەممە 2025.3.26، بە ئامادەبوونی هێمن قادر، پارێزگاری هەولێر بەوەکالەت و د.عەلی ڕەشید، سەرۆکی ئەنجوومەنی پارێزگای هەولێر و نەبەز عەبدولحەمید، قائیمقامی ناوەندی هەولێر و کارزان عەبدولهادی، سەرۆکی شارەوانی هەولێر و ژمارەیەکی تر لە بەڕێوەبەرانی فەرمانگە و دام و دەزگا حکومییەکان، لە چوارچێوەی یارییەکانی خولی پێنجەمی تۆپی پێی سەرۆکایەتی شارەوانی هەولێر، یاری کۆتایی لە نێوان هەردوو تیپی بەڕێوەبەرایەتی پارکی شەهید سامی عەبدولڕەحمان و بەڕێوەبەرایەتی شارەوانی پێنج بەڕێوەچوو.

لە یارییەکی بەهێزدا لە نێوان هەردووتیپ، تیپی بەڕێوەبەرایەتی پارکی شەهید سامی عەبدولڕەحمان توانی بە 3 گۆڵ بەرامبەر بە 1 گۆڵ لە تیپی بەڕێوەبەرایەتی شارەوانی پێنج بباتەوە و نازناو و جامی خولەکە بەدەست بهێنێت.

پارێزگاری هەولێر بەوەکالەت، دوای پێدانی جامی پاڵەوانیەتییەکە و خەڵات بەسەر یەکەم و دووەم و سێیەمی خولەکە، وێڕای پیرۆزبایی، هیوای سەرکەوتنی بۆ یاریزانان و ڕاهێنەرانی تیپەکان و ناوبژیوانان خواست و دەستخۆشی لە سەرۆکایەتی شارەوانی هەولێر و سەرپەرشتیارانی کرد.

جێگەی باسە، لەم خولەدا کە لە ژێرچاودێری کارزان عەبدولهادی، سەرۆکی شارەوانی هەولێر بەبۆنەی مانگی پیرۆزی ڕەمەزان و بە بەشداری 18 تیپی فەرمانگە و دام و دەزگا حکومیەکانی سنووری سەرۆکایەتی شاروانی هەولێر سازکرابوو، بۆ ماوەی 17 ڕۆژ بەردەوام بوو و ئەمڕۆش کۆتایی بە خولەکە هات.