لە سەر قەڵاتی هەولێر ... ئێوارە خوانێك بۆ شوێنەوارناسە فەڕەنسیەکان سازكرا
لە سەر قەڵاتی هەولێر ...
ئێوارە خوانێك بۆ شوێنەوارناسە فەڕەنسیەکان سازكرا
ئەمشەو پێنجشەممە 2025.10.16، بە ئامادەبوونی ئومێد خۆشناو، پارێزگاری هەولێر و یان براێیم، کۆنسڵی گشتی فەڕەنسا لە هەولێر و کەیفی مستەفا، بەڕێوەبەری گشتیی شوێنەوار و کەلەپوور ، لە سەر قەڵای هەولێر، لەلایەن پەیمانگای فەڕەنسی ڕۆژهەڵاتی نزیک، ئێوارە خوانێك وەک ڕێزلێنانێک لەکار و ئەرکەکانیان بۆ تیمێكی شوێنەوارناسانی فەڕەنسی سازكرا.
لە ڕێورەسمەکەدا، پارێزگاری هەولێر، سوپاسی تیمی شوێنەوارناسە فەڕەنسیەکانی کرد، کە هاوکار و هەماهەنگی بەڕێوەبەرایەتی شوێنەوار و کەلەپووری هەولێر بوونە و، بەژدارییەکی چالاکیان هەبووە لە پڕۆژەی گەڕان و کەندن و پشکنینی شوێنەوارەکانی سنووری پارێزگای هەولێر، و هاوکاریکردنی شوێنەوارناسە فەڕەنسیەکان و دامەزراوە نێودەوڵەتییەکانی بە گرنگی وەسف کرد.
لە بەشێکی تری وتارەکەیدا، وێڕای پشتیوانی بەردەوامی بۆ پڕۆژە فەرەهەنگی و زانستییەکانیان، کە ئامانج لێی پاراستن و نیشاندانەوەی گەنجینە مێژوویی و شوێنەوارەکانی هەرێمی کوردستانە، تیشکی خستە سەر نۆژەنکردنەوەی
قەڵای هەولێر، کە یەکێکە لە نیشانەکانی مێژوویی و کلتووریی هەرێمی کوردستان و وەک یەکێک لە کۆنترین شوێنەوارە جیهانییەکان نیشانەیەکی بەهێزە لە ناسنامەی مێژوویی و شارستانیەتی هەولێری پایتەخت.
جێگەی باسە، لە بەردەوامی گرنگیدان بە بواری شوێنەوار، حكوومەتی هەرێمی كوردستان هەوڵیداوە لە رێگای زانكۆ پێشكەوتووەكانی ئەوروپا چەندین گرێبەستی شوێنەوارپارێزی واژوو بكات بۆ ئەوەی لە بواری هەڵكۆڵین و نۆژەنكردنەوە و رووپێوكردنی شوێنەوارەكان بەشێوەیەكی زانستیانە كاربكرێت، یەكێكیش لەوانە گرنگیدانی وڵاتی فەرەنسا بووە بەبواری شوێنەواری هەرێمی كوردستان، بۆ ئەو مەبەستەش لەساڵانی ڕابردوو چەندین دەزگای شوێنەوار و شوێنەوارناسانانی ئەو وڵاتە روویان لە هەرێمی كوردستان كردووە.
