بەگوژمەی زیاتر لە (80) هەشتا ملیۆن دینار، دەستکرا بەقیڕتاوکردنی شەقامی سەرەکی شاری شیاو

پێش نیوەڕۆى شەممە 2022.4.2، ئومید خۆشناو، پارێزگارى هەولێر، بەیاوەرى عەبدولواحید ئەحمەد، سەرۆکی شارەوانی هەولێر و ژمارەیەکی دیکە لەبەرپرسانی سەرۆکایەتی شارەوانی، پڕۆژەی قیرتاوکردنی شەقامی 20 مەتری و سەرەکی شاری شیاوی بەسەرکردەوە.
پارێزگارى هەولێر دواى بەسەرکردنەوەى پڕۆژەکە، کە بەگوژمەی (85,845,000) هەشتا و پێنج ملیۆن و هەشت سەد و چل و پێنج هەزار دینار، بەدرێژی 560م لەسەر 15%ی بودجەی سەرۆکایەتی شارەوانی هەولێر لەسنووری بەڕێوەبەرایەتی شارەوانی دوو جێبەجێدەکرێت، دەستخۆشى لە ئەندازیاران و تیمى سەرپەرشتیار و کرێکاران کرد و ئاماژەی بەوەدا لەئایندەیەکی نزیکدا، لەچوارچێوەی پڕۆژەکانی پەرەپێدانی پارێزگای هەولێر، دەست دەکەینەوە بەگەیاندنی پڕۆژە خزمەتگوزارییەکان بۆ هەموو ئەو شوێنانەی پێویستیان بەگەیاندنی خزمەتگوزارییە، بەتایبەتی ئەو جێگایانەی هەژارنشینن و کەمترین دەستی خزمەتگوزارییان پێگەیشتووە.
گوتیشى: "وەکو پارێزگاى هەولێر بە پێى ئەو بەرنامە و پلانانەى لەچوارچێوەى پڕۆژەکانى پەرەپێدانى پارێزگاى هەولێر دانراوه‌، بۆ ئەمساڵ 85 ملیار دینارە، ئەگەر هیچ گرفتێک نەیەتە ڕێگامان ئەمساڵ ژمارەیەکى زۆر لە پڕۆژەى خزمەتگوزارى لە سنوورى پارێزگاى هەولێر ئەنجامدەدەین".