هەولێر... پێنجەمین پاڵەوانیەتی نێودەوڵەتی (راپید)ی شەترەنج دەستى پێکرد

هەولێر...
پێنجەمین پاڵەوانیەتی نێودەوڵەتی (راپید)ی شەترەنج دەستى پێکرد

دواى نیوەڕۆى ئەمڕۆ پێنجشەممە 2025.8.21، لە ژێرچاودێری ئومێد خۆشناو، پارێزگاری هەولێر و بە ئامادەبوونى چیا هەرکی، یاریدەدەری بەرپرسی مەکتەبی ڕێکخستنی هەولێری پارتی و زانا مەلا خالید، بەرپرسی لقی2ی پارتی و هێمن سەید موراد، بەڕێوەبەری گشتیی کشتوکاڵ و کارزان عەبدولهادی، سەرۆکی شارەوانی و سەفین یاسین سەرۆکی یانەی هەولێر و ئەندامانی دەستەی کارگێری یانەکە و سەرۆکى یەکێتى شەترەنجى هەولێر و ژمارەیەکی تر لە وەرزشوان و وەرزش دۆستان، پێنجەمین پاڵەوانیەتی نێودەوڵەتی (راپید)ی شەترەنج بە بەشداری زیاتر لە 150 یاریزان لە سەر ئاستی کوردستان و عێراق دەست پێکرد و دوو ڕۆژ بەردەوام دەبێت.

پارێزگارى هەولێر، دواى کردنەوەى پاڵەوانیەتییەکە، وێڕاى دەستخۆشى لە سەرپەرشتیار وڕێکخەران و یانەى وەرزشى هەولێر، هیواى سەرکەوتنى بۆ یاریزانان و بەشداربووانى خواست.

جێگەى باسە، پاڵەوانیەتیەكە راپیدە 10 + 15 واتە دەستپێك 15 خولەك و بۆ هەر جولەیەك 10چركە زیاد دەبێت، یانەی هەولێر بەرێوەدەبات و پاڵەوانیەتییەكە باوەرپێكراوە لە لایەن یەكێتی شەترەنجی جیهانیەوە و لە کۆتایشدا خەڵات بەسەر براوەکان و باشترین یاریزانەکانى پاڵەوانیەتییەکە دابەش دەکرێت.