پارێزگاری هەولێر، سەردانی ناوەندەی ڕاوێژكاری پڕکردنەوەی فۆڕمی زانکۆلاینی بۆ دەرچووانی پۆلی 12ی ئامادەیی دەكات

پارێزگاری هەولێر، سەردانی ناوەندەی ڕاوێژكاری پڕکردنەوەی فۆڕمی زانکۆلاینی بۆ دەرچووانی پۆلی 12ی ئامادەیی دەكات

ئەمڕۆ سێشەممە 2025.9.30، ئومێد خۆشناو، پارێزگاری هەولێر، بەمەبەستی لە نزیكەوە ئاگاداربوون لە چۆنیەتی بەڕێوەچونی کارەکان و هاریکاریکردنی قوتابیانی دەرچووی پۆلی 12ی ئامادەیی، سەردانی ناوەندەی ڕاوێژكاری پڕکردنەوەی فۆڕمی زانکۆلاین لە پەیمانگەی تەکنیکی کارگێڕی هەولێر كرد، كە بە هەماهەنگی لەگەڵ لقی منارەی یەکێتی قوتابیان و لاوانی دیموکراتی کوردستان كراوەتەوە.

لە سەردانەكەیدا، پارێزگاری هەولێر، دوای ئەوەی لە نزیكەوە بەدواداچوونی بۆ كاروبارەكان كرد، دەستخۆشی لە ڕاگری پەیمانگە و لقی منارەی یەکێتی قوتابیان و لاوان و ستافی كاری ناوەندەكە كرد و هیوای سەرکەوتنی بۆ قوتابیان خواست لە دوای وەرگیرانیان لە بەشە جیا جیاکانی کۆلێژ و پەیمانگەکان .

جێگەی باسە، ناوەندەی ڕاوێژكاری پڕکردنەوەی فۆڕمی زانکۆلاین بۆ دەرچوانی پۆلی 12ی ئامادەیی، بە مەبەستی یارمەتیدانی دەرچووانی پۆلی 12ی ئامادەیی لە هەنگاوی یەکەمیان بەرەو زانکۆ و دیاریکردنی باشترین هەلبژاردە بەپێی ئارەزوو و ئاستی زانستی خوێندنیان كراوەتەوە.