پارێزگاری هەولێر پێشوازی لە لۆرد مایکل ئاشکرافت، سەرۆکی فەخری یەکێتیی نێودەوڵەتیی دیموکراسی، کرد
پارێزگاری هەولێر پێشوازی لە لۆرد مایکل ئاشکرافت، سەرۆکی فەخری یەکێتیی نێودەوڵەتیی دیموکراسی، کرد
ئەمرۆ سێشەممە 29.9.2026 ئومێد خۆشناو، پارێزگاری هەولێر، لە دیوانی پارێزگای هەولێر، پێشوازی لە لۆرد مایکل ئاشکرافت، سیاسەتکار و خاوەنکاری ناسراوی بەریتانی و سەرۆکی فەخری یەکێتیی نێودەوڵەتیی دیموکراسی (IDU)، و شاندی یاوەری کرد.
لە دیدارەکەدا، لۆرد مایکل ئاشکرافت خۆشحاڵی خۆی بە سەردانی هەرێمی کوردستان و شاری هەولێر دەربڕی و ئامانجی سەردانەکەی بۆ زیاتر ناسین و تێگەیشتن لە مێژوو، خەبات و قوربانیدانی گەلی کوردستان خستەڕوو.
لە بەشی دیکەی دیدارەکەدا، بارودۆخی هەرێمی کوردستان و گۆڕانکارییەکان و پێشکەوتنەکانی شاری هەولێر بوونە بابەتی گفتوگۆ، بەتایبەتی لە بوارەکانی ئاوەدانکردنەوە، وەبەرهێنان و بزاوتی ئابووری و ئاسایش و ئارامی .
پارێزگاری هەولێر، لە دیدارەکەدا ئاماژەی بە گرنگیی هەولێر وەک ناوەندی سیاسی، ئابووری و کۆمەڵایەتی هەرێمی کوردستان کرد و جەختی لەسەر ئەوە کردەوە کە هەولێر بە مێژووی قووڵ، فرەڕەنگی و پێکەوەژیانی کۆمەڵایەتی، بووەتە نموونەیەکی دیار لە پێکەوەژیان و قبووڵکردنی جیاوازییەکان.
هەروەها، هەردوو لایەن گرنگییان بە پەرەپێدانی پەیوەندییەکان و هەماهەنگیی زیاتر لە بوارە جۆراوجۆرەکاندا و جەختیان لەسەر بەردەوامبوونی گفتوگۆ و ئاڵوگۆڕی ئەزموونەکان کردەوە.
شایەنی ئاماژە بۆکردنە، سەردانی لۆرد مایکل ئاشکرافت بۆ هەولێر لە چوارچێوەی کۆمەڵێک چالاکی و دیداری ئەو لە هەرێمی کوردستان بەڕێوەدەچێت.
