بەئامادەبوونى پارێزگارى هەولێر، کۆتایى بە خولى دیزاینى بونیاتنانى بیناکان هێنرا
سەرلەبەیانى سێشەممە 2022.3.15، بەئامادەبوونى ئومێد خۆشناو، پارێزگارى هەولێر، لەریورەسمێکدا بەڕێوەبەرایەتى گشتیى ڕێگاوبان و ئاوەدانکردنەوە و نیشتەجێکردنى هەولێر کۆتایی بە خولى دیزاینى بونیاتنانى بیناکان هێنا کە بۆ ماوەى مانگێک بە بەشدارى 20 ئەندازیارى بیناسازى ئەنجدامیدابوو.
لەڕێورەسمەکەدا کە هەریەک لە مەسعود کاڕەش، جێگرى پارێزگار و نەبەز عەبدولحەمید، قائیمقامى ناوەند و هونەر نورى، بەرێوەبەرى گشتیى ڕێگاوبان و ئاوەدانکردنەوە و نیشتەجێکردنى هەولێر و ئەندازیار نهرین ڕەحمان بایز، بەرێوەبەرى ئاوەدانکردنەوە و نیشتەجێکردنى هەولێر ئامادەی بوون، لەلایەن پارێزگارى هەولێر بڕوانامەى بەشداریکردن بەسەر بەشداربووانى خولەکەدا دابەشکرا و هیواى سەرکەوتن و بەردەوامى بۆ خواستن، پاشان پارێزگارى هەولێر خەڵاتى ڕێزلێنانى بەرێوەبەرایەتى ئاوەدانکردنەوە و نیشتەجێکردنى هەولێرى پێشکەش بە بەرێوەبەرى گشتیى ڕێگاوبان و ئاوەدانکردنەوە و نیشتەجێکردنى هەولێر کرد.
