بە ئامادەبوونی سەرۆکی هەرێمی کوردستان، تەرمی نۆ گەشتیارە عەرەبەکانی بۆردوومانی ناوچەیەکی گەشتیاری زاخۆ بەرەو فڕۆکەخانەی بەغدا بەڕێکرا

بە ئامادەبوونی رێزدار نێچیرڤان بارزانی، سەرۆکی هەرێمی کوردستان و پشتیوان سادق بە نوێنەرایەتی رێزدار سەرۆکی حکومەتی هەرێمی کوردستان و فواد حوسێن وەزیری دەرەوەی حکومەتی عێراقی فیدرال و هێمن هەورامی جێگری سەرۆکی پەرلەمانی کوردستان و سەرۆکی فراکسێۆنەکانی پەرلەمانی کوردستان و سامان بەرزنجی وەزیری تەندروستی حکومەتی هەرێم و ئومێد خۆشناو پارێزگاری هەولێر و سەرۆکی ئەرکانی پێشمەرگە، لە فرۆکەخانەی هەولێری نێودەوڵەتی بەشداریان لە مەراسیمی گەڕاندنەوەی تەرمی ئەو نۆ گەشتیارەی لە تۆپبارانێکی گوندی پەرەخ لە سنووری زاخۆدا گیانیان لەدەستدا کرد …
سەرۆکی هەرێمی کوردستان دوای دانانی تاجە گوڵینە لەسەر تەرمی قوربانییەکان و بەشداری کردن لە گواستنەوەی تەرمەکان بۆ ناو فرۆکەی تایبەت، چووە لای کەسوکاری قوربانییەکان و هاوخەمی خۆی بۆ دەربڕین.
شایەنی باسە رۆژی چوارشەممە 20-07-2022 فرۆکەکانی تورکیا چەند تۆپێکیان ئاراستەی ناوچەیەکی گەشتیاریی سنووری زاخۆ کرد و بەهۆیەوە نۆ کەس گیانیان لەدەستداو 26 کەسی دیکەش بریندار بوون، ئەو کەسانەی بوونەتە قوربانی، سەرجەمیان گەشتیاری عەرەبن و لە پارێزگاکانی عێراقەوە چووبوونە ئیدارەی سەربەخۆی زاخۆ .